ភ្នំពេញ៖ យោងតាមរបាយការណ៍ក្រសួងទេសចរណ៍បានឱ្យដឹងថា កាលពីថ្ងៃទី៧ និងទី៨ ខែឧសភា កន្លងទៅមានទេសចរចំនួន ២៩៩ ៨៨៨នាក់ បានចេញដើរកម្សាន្ត ដោយក្នុងនោះមានទេសចរជាតិ ២៨៣ ៩៩០នាក់ និង ទេសចរបរទេស ១៥ ៨៩៨នាក់។
រដ្ឋមន្ត្រីក្រសួងទេសចរណ៍ លោក ថោង ខុន បានឲ្យដឹងថា ខេត្តតំបន់ឆ្នេររួមមាន ខេត្តព្រះសីហនុ កែប និងខេត្តកំពត រួមជាមួយគោលដៅទេសចរណ៍នៅភាគពាយ័ព្យនៃខេត្តសៀមរាប បាត់ដំបង និងខេត្តពោធិ៍សាត់ នៅតែជាគោលដៅពេញនិយមសម្រាប់ភ្ញៀវទេសចរនាចុងសប្តាហ៍កន្លងមក។
ខេត្តព្រះសីហនុ គឺជាគោលដៅទេសចរណ៍សំខាន់ទី១ ដែលមានទេសចរទៅកម្សាន្តច្រើនជាងគេ ដោយមាន ៦១ ០២០នាក់ បន្ទាប់មក រាជធានីភ្នំពេញមានចំនួន ៤០ ៤៨០នាក់ ខេត្តបាត់ដំបង ៣៤ ៧៩០នាក់ ខេត្តកំពត ៣០ ៧០៥នាក់ ខេត្តកែប ២៩ ៥០៩នាក់ ខេត្តសៀមរាប ១៨ ៦៩៦នាក់ និងខេត្តពោធិ៍សាត់ ១៥ ១១១នាក់។
លោកបន្តថា នេះជាសប្តាហ៍ទី៣ ជាប់គ្នាបន្ទាប់ពីពិធីបុណ្យចូលឆ្នាំប្រពៃណីជាតិ ដែលចរន្តភ្ញៀវទេសចរផ្ទៃក្នុងមានចំនួនប្រមាណ ៣០ម៉ឺននាក់ ខណៈដែលមុនពិធីបុណ្យចូលឆ្នាំ ចរន្តភ្ញៀវជាមធ្យមក្នុងចន្លោះ២០-២៥ម៉ឺននាក់៕
